കൃതജ്ഞത — ജീവിതത്തെ രൂപാന്തരപ്പെടുത്തുന്ന മനോഭാവം

നമ്മിൽ സന്തോഷവും സമാധാനവും നിറയ്ക്കുന്ന ഒരു അത്ഭുതമരുന്നുണ്ട്. അതാണ് ഇന്ന് ഞാൻ നിങ്ങളെ പരിചയപ്പെടുത്തുവാൻ ആഗ്രഹിക്കുന്നത്— അതിന്റെ പേര് കൃതജ്ഞത എന്നാണ്.

  അതുണ്ടെങ്കിൽ എത്ര സാധാരണ ജീവിതവും മനോഹരമാകും.

റോമൻ ചിന്തകനായ സിസറോ ഒരിക്കൽ പറഞ്ഞു:

“Gratitude is not only the greatest of virtues, but the parent of all others.”
“കൃതജ്ഞത എല്ലാ സൽഗുണങ്ങളുടെയും മാതാവാണ്.”

നന്ദിയുള്ള ഹൃദയമാണ് മനുഷ്യന്റെ യഥാർത്ഥ സമ്പത്ത്. കൃതജ്ഞതയുള്ളവർ ദാരിദ്ര്യത്തിലായാലും സമ്പന്നരാണ്; നന്ദിയില്ലാത്തവർ സമ്പന്നരായാലും ദരിദ്രരാണ്.

എന്താണ് കൃതജ്ഞത എന്ന് മനസ്സിലാക്കാൻ ശ്രമിക്കാം.

ഒരാൾ നമുക്ക് ചെയ്യുന്ന നന്മ തിരിച്ചറിയുകയും അത് അംഗീകരിക്കുകയും ചെയ്യുന്നതാണ് നന്ദി.
  കൃതജ്ഞത അതിലും വിശാലമായ ഒരു ദർശനമാണ് —
എപ്പോഴും എവിടെയും എല്ലാവരിലും നന്മ കാണാനും അതിൽ സന്തോഷിക്കാനുമുള്ള മനോഭാവം. ഇംഗ്ലീഷിൽ അതിന് ഗ്രാറ്റിറ്റ്യൂഡ് എന്ന് പറയും.

ഒരു ചെറിയ ഉദാഹരണം നോക്കാം:
ഒരാൾ നമുക്ക് കുടിക്കാൻ അരക്കപ്പ് വെള്ളം തരുന്നു.
നമുക്ക് രണ്ടുതരത്തിൽ ചിന്തിക്കാം:
 

“അരക്കപ്പ് മാത്രമേയുള്ളൂ” അല്ലെങ്കിൽ “അരക്കപ്പ് വെള്ളമെങ്കിലും ഉണ്ട്.”
 

രണ്ടും സത്യമാണ് — പക്ഷേ ഒന്നാമത്തേത് പരാതിയാണ്, രണ്ടാമത്തേത് നന്ദിയാണ്.
ജീവിതത്തിന്റെ സൗന്ദര്യം രണ്ടാമത്തേത് തിരഞ്ഞെടുക്കുമ്പോഴാണ് പ്രകടമാകുന്നത്.

 നന്ദിയും പരാതിയും എങ്ങനെ ഉത്ഭവിക്കുന്നു എന്ന് കാണാം.

15 വയസ്സുകാരനായ അപ്പു ജന്മദിനത്തിൽ ഒരു ഐഫോൺ പ്രതീക്ഷിക്കുന്നു. കിട്ടിയില്ലെങ്കിൽ നിരാശയും ദുഃഖവും പരാതിയും. പക്ഷേ അപ്പു ഒന്നും പ്രതീക്ഷിക്കാതെ ഇരുന്നാലോ?  ചെറിയൊരു പുസ്തകം ലഭിച്ചാലും അതിൽ ആഹ്ലാദം കണ്ടെത്തും. ഒന്നും ലഭിച്ചില്ലെങ്കിൽ പോലും അതിൽ വിഷമവുമില്ല.

ജീവിതത്തിലെ മിക്ക നിരാശകളുടെയും അടിസ്ഥാനം ഇതുതന്നെ — നമ്മുടെ പ്രതീക്ഷകൾ.

“ പ്രതീക്ഷ കൂടുന്തോറും, സന്തോഷവും കൃതജ്ഞതയും കുറയും.

ഒന്നും പ്രതീക്ഷിക്കാത്ത മനസ്സിന് ലഭിക്കുന്നതെല്ലാം സമ്മാനമായി തോന്നും.
അത് തന്നെയാണ് സന്തോഷത്തിന്റെ രഹസ്യം.

 മറ്റുള്ളവരെക്കുറിച്ച് നമുക്ക് പ്രതീക്ഷകൾ ഉണ്ടാകുന്നത് എന്തുകൊണ്ടാണ്?

പലപ്പോഴും നാം കരുതുന്നത് മറ്റുള്ളവർ നമുക്ക് നന്മ ചെയ്യാൻ കടപ്പെട്ടവരാണ് എന്നാണ്.
പക്ഷേ യാഥാർത്ഥ്യം ഇതാണ്:  ആർക്കും നമ്മോട് കടപ്പാടില്ല.
എന്നാൽ നമ്മളെല്ലാവരും പരസ്പരം സഹായിച്ച് ജീവിക്കേണ്ടവരാണ്. 

ഇത് തിരിച്ചറിയുമ്പോൾ പരാതിയല്ല, കൃതജ്ഞത നമ്മിൽ വളരും.
നാം ചെറുതും സാധാരണവുമായ കാര്യങ്ങളിലും സൗന്ദര്യം കാണാൻ തുടങ്ങും —
ഒരു പുഞ്ചിരിയിൽ, ഒരു ചെറു സഹായത്തിൽ, ഒരു മന്ദമാരുതന്റെ സ്പർശനത്തിൽ പോലും.

മഹാന്മാരുടെ വാക്കുകൾ

മതങ്ങളെയും കാലങ്ങളെയും കടന്ന് എല്ലാ ജഗദ് ഗുരുക്കന്മാരും കൃതജ്ഞതയെ മനുഷ്യന്റെ മഹത്തായ ശക്തിയായി കണ്ടു.

ശ്രീ ബുദ്ധൻ പറഞ്ഞു:

“നന്ദിയുള്ളവൻ എളുപ്പത്തിൽ സന്തോഷം കണ്ടെത്തുന്നു; അവൻ എവിടെയായാലും സമാധാനത്തോടെയിരിക്കുന്നു.”

കൺഫ്യൂഷ്യസ് പറഞ്ഞു:

“മറ്റുള്ളവരുടെ ദോഷം മറക്കുക, പക്ഷേ അവരുടെ നന്മ ഒരിക്കലും മറക്കരുത്.”

സോക്രട്ടീസ് പറഞ്ഞു:

“നന്ദിയുള്ള മനസ്സ് അറിവിനും ധർമ്മത്തിനും വാതിൽ തുറക്കുന്നു.”

മുഹമ്മദ് നബി പറഞ്ഞു:

“ആളുകളോട് നന്ദി പറയാത്തവൻ, ദൈവത്തോടും നന്ദി പറയുന്നില്ല.”

 താൻ സൗഖ്യമാക്കിയ 10 കുഷ്ടരോഗികളിൽ ഒരാൾ മാത്രം തിരിച്ചു വന്നപ്പോൾ യേശു പറഞ്ഞു:

“പത്തു പേരിൽ ഒരാൾ മാത്രം നന്ദി പറയാൻ തിരിച്ചുവന്നു.”
  

ഇവരുടെ വാക്കുകൾ മതഭേദമില്ലാതെ ഒരേ സത്യം പറയുന്നു —
കൃതജ്ഞതയുള്ള മനസ്സ് സമാധാനത്തിന്റെയും സഹവർത്തിത്വത്തിന്റെയും ഉറവിടമാണ്.

കൃതജ്ഞത സ്വാഭാവികമായി വളരുന്നില്ല — അത് പരിശീലിക്കേണ്ടതുണ്ട്. കൃതജ്ഞതയെ വളർത്താൻ ചില ചെറു പരിശീലനങ്ങൾ സഹായിക്കും.

1️⃣ രാത്രി ഉറങ്ങാൻ പോകുന്നതിന് മുമ്പ്:
അന്ന് നടന്ന മൂന്നു നല്ല കാര്യങ്ങൾ ഓർക്കുക — ചെറിയതായാലും മതിയാകും.
ഒരു പുഞ്ചിരി, ഒരു സൗഹൃദം, ഒരു രുചികരമായ ഭക്ഷണം — എന്തും.
നമുക്ക് സന്തോഷം തോന്നുന്ന മൂന്നു കാര്യങ്ങൾ ആയിരിക്കണം.  കാലംകഴിയുന്തോറും നമുക്ക് ലോകം കൂടുതൽ മനോഹരമായി തോന്നിത്തുടങ്ങും.

2️⃣ രാവിലെ ഉണരുമ്പോൾ:
ഒരു നന്ദി ചിന്തയോടെ തുടങ്ങുക:

“ഇന്ന് ഞാൻ ജീവിക്കുന്നു, കാണുന്നു, കേൾക്കുന്നു, അനുഭവിക്കുന്നു, എന്റെ ഹൃദയം മിടിക്കുന്നുണ്ട്, ഞാൻ ശ്വാസോച്ഛ്വാസം ചെയ്യുന്നുണ്ട് — അതിന് നന്ദി.”

ഈ രണ്ടു ലളിതമായ വ്യായാമങ്ങൾ  നമ്മുടെ മനസ്സിനെ രൂപാന്തരപ്പെടുത്തും.
 

നന്ദി പറയുമ്പോൾ പരാതികൾ മറക്കും; പരാതിപ്പെടുമ്പോൾ സന്തോഷം നഷ്ടപ്പെടുത്തും.

കൃതജ്ഞത മനുഷ്യനെ സ്വാർത്ഥതയിൽ നിന്ന് സഹാനുഭൂതിയിലേക്ക്, നയിക്കും

പരാതിയിൽ നിന്ന് കരുണയിലേക്ക്,
നയിക്കും ദുഃഖത്തിൽ നിന്ന് സമാധാനത്തിലേക്ക് നയിക്കും.

നന്ദിയുള്ളവൻ എവിടെയായാലും പ്രകാശം പകരും.
കുടുംബത്തിലും, ജോലി സ്ഥലത്തും, സമൂഹത്തിലും
അവൻ ചുറ്റുമുള്ളവരിൽ സന്തോഷത്തിന്റെ വിത്തുകൾ വിതറും;

നന്ദിയുള്ളവർ ഉള്ളിടത്ത് തർക്കങ്ങൾ എളുപ്പത്തിൽ പരിഹരിക്കപ്പെടും.

 സുഹൃത്തുക്കളെ,
കൃതജ്ഞത ഒരു വികാരം അല്ല — ഒരു ജീവിതശൈലിയാണ്.
അത് നമ്മെ മനുഷ്യരാക്കുന്നു, പരസ്പരം ബന്ധിപ്പിക്കുന്നു,
ജീവിതത്തെ ഒരു ഉത്സവമാക്കുന്നു. നമുക്ക് ഉള്ളത് മതിയെന്നു തോന്നുന്ന നിമിഷം മുതൽ

നാം സമ്പന്നരാകുന്നു.

നമുക്ക് ഇന്നുതന്നെ തീരുമാനിക്കാം:

“ഞാൻ പരാതിയല്ല, നന്ദി പറയാൻ പഠിക്കും.
ജീവിതത്തിലെ ഓരോ അനുഭവത്തെയും ഞാൻ വിലമതിക്കും. എല്ലാറ്റിലും തിന്മയല്ല നന്മ കാണാൻ ഞാൻ പഠിക്കും.

നന്ദിയുള്ള ഹൃദയങ്ങൾ ചേർന്നാൽ ലോകം കൂടുതൽ മനോഹരമാകും.
കൃതജ്ഞത — അതാണ് സന്തോഷത്തിന്റെ ഭാഷയും സമാധാനത്തിന്റെ വഴിയും.