Wednesday, December 14, 2016

സ്വര്‍ഗ്ഗത്തിന്‍ രാജകുമാരന്‍

കേള്‍ക്കുവിന്‍ ബാലകരെ ശ്രധയോടിതാ
ക്രിസ്തുമസിന്‍ കഥയോതിടാം ഞാന്‍
പണ്ടു രണ്ടായിരമാണ്ടുകള്‍ക്കപ്പുറം
ഉണ്ടായ്‌ മഹാശ്ചര്യമീസംഭവം 

മറിയയെന്നൊരു പാവം ഗ്രാമീണ ബാലിക
ബേതലേം നഗരിയിലെത്തിയപ്പോള്‍
രാത്രിനേരത്ത് പശുത്തൊഴുത്തിന്നുള്ളില്‍
ജന്മമേകിയൊരു പൈതലിന്

ഈ നേരം സ്വര്‍ഗ്ഗലോകത്തില്‍ മാലാഖമാര്‍
ഇപ്പൈതലിന്‍ ജന്മമാഘോഷിച്ചാര്‍
നന്നായറിഞ്ഞവര്‍ ഇപ്പൈതലാരെന്ന്
സ്വര്‍ഗ്ഗത്തിന്‍ രാജകുമാരനെന്ന്

സ്വര്‍ഗ്ഗത്തില്‍ നിന്നുമീ വാര്‍ത്ത പ്രഘോഷിപ്പാന്‍
എത്തിയീ ഭൂവിലും മാലാഖമാര്‍
നിദ്രയിലാണ്ടു കിടന്ന ഭൂവാസികള്‍
 ഒന്നുമേ കണ്ടില്ല കേട്ടുമില്ല

ആടുകളെക്കാത്ത് നിദ്രാവിഹീനരായ്
ഇരുന്നൊരു പറ്റം ഇടയര്‍ മാത്രം
ഈ വാര്‍ത്ത കേട്ടിട്ട് പൈതലിനെക്കാന്മാന്‍
രാതിയില്‍ ആഗതരായി പോലും

ഒരു പ്രഭുവിന്നൊരു പൈതല്‍ പിറന്നെങ്കില്‍
ഉത്സവമാഘോഷിച്ചേനെയവര്‍
അവിടുത്തുകാരെല്ലാം നിദ്രവെടിഞ്ഞിട്ട്
ആനന്ദനര്‍ത്തനമാടിയേനെ

സ്വര്‍ഗ്ഗത്തിന്‍ രാജകുമാരന്‍ പിറന്നിട്ട്
എന്തേ അവരറിയാതെ പോയി?
സ്വര്‍ഗ്ഗത്തിലുല്‍സവമുണ്ടായിയെങ്കിലും
എന്തേയീ ഭൂവിലില്ലാതെ പോയി?

ഉണ്ട് കണ്‍കള്‍ ഈ ഭൂവാസികള്‍ക്കെന്നാലും
കാഴ്ചയെന്തേയവര്‍ക്കില്ലാതെയായ്? 
ഉണ്ട് കാതുകള്‍ ഭൂവാസികള്‍ക്കെന്നാലും
കേള്‍വിയെന്തേയവര്‍ക്കില്ലാതെയായ്?

തിരിച്ചറിഞ്ഞേനെ സ്വര്‍ഗ്ഗത്തിന്‍ കുമാരനെ
രാജകൊട്ടാരത്തില്‍ പിറന്നുവെങ്കില്‍
തിരിച്ചറിഞ്ഞില്ലവര്‍ ഗ്രാമീണബാലയ്ക്കൊ-
രു കാലിക്കൂട്ടില്‍ പിറന്നതിനാല്‍

വിലകെട്ട കാര്യങ്ങള്‍ വിലയുള്ളതായിട്ടും
വിലയുള്ളതോ വിലകെട്ടതായും
പുറം മോടികള്‍ മാത്രം കണ്ടു ഭ്രമിക്കുന്നു
കാണാതെ പോകുന്നു കാണേണ്ടത്

സ്വര്‍ഗ്ഗസമാനമായ് ഉരുവായ ഭൂതലം
എങ്ങനെ നരകസമാനമായി? 
കാരണം സത്യത്തെ സത്യമായ് കാണാതെ 
ഉള്‍ക്കണ്‍കള്‍ കുരുടായി തീര്‍ന്നതത്രേ

അന്ധത നീക്കി പ്രകാശം വരുത്തുവാന്‍
നമ്മുടെ ഭൂവിലെഴുന്നെള്ളിയ
സ്വര്‍ഗ്ഗത്തിന്‍ രാജകുമാരനെ ഈ ക്രിസ്മസ്
നാളില്‍ വരവേല്‍ക്കാം ആമോദമായ്

ജോണ്‍ കുന്നത്ത്

No comments: