മരുഭൂമിയിലെ ശബ്ദം

ആദ്യകാല ക്രൈസ്തവർക്കിടയിൽ യേശുവിനെക്കുറിച്ച് വ്യത്യസ്തമായ ധാരണകൾ ഉണ്ടായിരുന്നു. ചിലർ യേശുവിന്റെ ദൈവത്വത്തിന് കൂടുതൽ പ്രാധാന്യം നൽകി. മറ്റു ചിലർ അദ്ദേഹത്തിന്റെ മനുഷ്യത്വത്തിന് പ്രാധാന്യം നൽകി. യേശു ദൈവമാണോ മനുഷ്യനാണോ എന്നതിലുപരി, അദ്ദേഹം എങ്ങനെയാണ് ദൈവവും മനുഷ്യനുമായിരിക്കുന്നത് എന്നതായിരുന്നു ക്രമേണ ഉയർന്നുവന്ന ചോദ്യം. യേശു പിതാവായ ദൈവത്തിന് തുല്യനാണോ? അതോ പിതാവിനേക്കാൾ താഴ്ന്ന സ്ഥാനത്തുള്ള ദൈവിക അസ്തിത്വമാണോ? യേശു പൂർണ്ണ ദൈവമാണെങ്കിൽ അദ്ദേഹത്തിന്റെ മനുഷ്യത്വത്തിന് എന്താണ് അർത്ഥം? അദ്ദേഹം പൂർണ്ണ മനുഷ്യനാണെങ്കിൽ അദ്ദേഹത്തിന്റെ ദൈവികതയെ എങ്ങനെ മനസ്സിലാക്കണം? ഇങ്ങനെ ചോദ്യങ്ങൾ ഒന്നിനുപുറകെ ഒന്നായി ഉയർന്നുവന്നു. ഓരോ വിഭാഗവും തങ്ങളുടെ നിലപാടാണ് ശരിയെന്ന് വാദിച്ചു. തർക്കങ്ങൾ സഭയ്ക്കുള്ളിൽ വലിയ ഭിന്നതകൾ സൃഷ്ടിച്ചു. ചിലപ്പോൾ രാഷ്ട്രീയ അധികാരികൾപോലും ഇതിൽ ഇടപെട്ടു. ഒരു കാലത്ത് അംഗീകരിക്കപ്പെട്ട വിശ്വാസം മറ്റൊരു കാലത്ത് എതിർക്കപ്പെടുകയും അതിന്റെ വക്താക്കൾ അധികാരത്തിൽനിന്ന് പുറത്താക്കപ്പെടുകയും ചെയ്തു. ഒടുവിൽ യേശു പൂർണ്ണ ദൈവവും പൂർണ്ണ മനുഷ്യനുമാണെന്ന് സഭ ഔദ്യോഗികമായി പ്രഖ്യാപിച്ചു. എന്നാൽ അതുക...